Գերմանիայի արտաքին գործերի նախարարությունը հայտարարել է Թբիլիսիում Գերմանիայի դեսպան Պիտեր Ֆիշերի նկատմամբ Վրաստանի իշխանությունների ագրեսիվ հռետորաբանության անթույլատրելիության մասին:
«Մենք կտրականապես մերժում ենք Գերմանիայի դեսպանի հասցեին «Վրացական երազանքի» ներկայացուցիչների շարունակվող ագրեսիվ հռետորաբանությունը։ Թբիլիսիում Գերմանիայի դեսպանը ներկայացնում է դաշնային կառավարության դիրքորոշումը: Գերմանիան վրացական իշխանություններին կրկին կոչ է անում դադարեցնել ԵՄ- ի և Գերմանիայի դիրքորոշման և քաղաքականության մասին կեղծ պատմությունների տարածումը և փոխել իր ներկայիս քաղաքական կուրսը», - ասված է արտաքին քաղաքական գերատեսչության հայտարարության մեջ, որը տարածել է Վրաստանում Գերմանիայի դեսպանատունը:
ԱԳՆ-ում անհիմն են անվանել Վրաստանի խորհրդարանի խոսնակ Շալվա Պապուաշվիլիի մեղադրանքները, թե իբր Ֆիշերը միջամտում է Վրաստանի ընտրություններին՝ աջակցելով քաղաքական բռնություն հրահրողներին:
«Մենք մտահոգված ենք, որ տարածելով ապատեղեկատվություն և վիճելի նարատիվներ՝ այն ակտիվորեն խաթարում է Գերմանիայի և Վրաստանի հարաբերությունները»,- ընդգծել են ԱԳՆ-ում:
Ֆիշերը բազմիցս բացահայտորեն դատապարտել է իշխանությունների կուրսը, մասնակցել քաղբանտարկյալների դատավարություններին, աջակցություն հայտնել քաղաքացիական հասարակությանը:
Այս ֆոնին նրա նկատմամբ ճնշումներն ուժեղանում են. իշխանամետ լրատվամիջոցները դիվանագետին մեղադրում են ընդդիմության հետ կապերի մեջ:
