Միավորված ազգերի կազմակերպության բարձրաստիճան ներկայացուցիչը կիրակի օրը հայտարարել է, որ Գազայի հատվածում սովի հետագա տարածումը կանխելու համար գոյություն ունի «նեղ ժամանակային պատուհան»։ Նա կոչ է արել Իսրայելին թույլ տալ անխոչընդոտ մարդասիրական օգնություն մատակարարել այն տարածք, որտեղ Իսրայելը պայքարում է պաղեստինյան «ՀԱՄԱՍ» ռազմական խմբավորման դեմ։
Համաշխարհային սովի մոնիթորինգի կենտրոնի տվյալներով՝ հարյուր հազարավոր պաղեստինցիներ արդեն տառապում են սովից կամ գտնվում են դրա վտանգի տակ այնպիսի վայրերում, ինչպիսին է Գազայի քաղաքը՝ անկլավի խոշորագույն քաղաքային կենտրոնը, որտեղ Իսրայելը սկսել է նոր հարձակում «ՀԱՄԱՍ»-ի դեմ։
Իսրայելը, որը մարտից մինչև մայիսի կեսերը 11 շաբաթով դադարեցրել էր ամբողջ օգնությունը, պնդում է՝ ավելի շատ ջանքեր է գործադրում Գազայի հատվածում օգնության մուտքն ու բաշխումն ապահովելու համար։ Այդուհանդերձ, միջազգային գործակալությունները հայտարարում են, որ անհրաժեշտ է զգալիորեն ավելի մեծ ծավալի օգնություն։
«Մինչև սեպտեմբերի վերջ կա կարճ ժամանակահատված՝ Դեյր էլ-Բալահում (Գազայի կենտրոնական հատված) և Խան Յունիսում (Գազայի հարավային հատված) սովի տարածումը կանխելու համար։ Այդ ժամանակը արագորեն սպառվում է», - հայտարարել է ՄԱԿ-ի մարդասիրական ծրագրերի ղեկավար Թոմ Ֆլետչերը։
