Օգոստոսի 8-ին Վաշինգտոնում տեղի ունեցավ Ադրբեջանի և Հայաստանի միջև խաղաղության համաձայնագրի նախաստորագրումը, ինչը կարևոր քայլ էր երկու երկրների միջև հարաբերությունների կարգավորման ճանապարհին. հայտարարել է Ադրբեջանի նախագահի հատուկ հանձնարարությունների գծով ներկայացուցիչ դեսպան Էլչին Ամիրբեկովը I24 News հեռուստաալիքին տված հարցազրույցում:
Նա նշել է, որ այս փուլում խոսքը գնում է միայն նախաստորագրման, բայց ոչ՝ վերջնական ստորագրման մասին:
«Խաղաղության համաձայնագրի ստորագրման և հետագա իրագործման համար հայկական կողմը դեռևս պետք է կոնկրետ քայլեր ձեռնարկի: Մենք պետք է հստակ քայլեր ձեռնարկենք: Մասնավորապես, Հայաստանի սահմանադրությունը մինչ օրս պարունակում է կետեր, որոնք արտահայտում են անընդունելի տարածքային պահանջներ և հակասում են Ադրբեջանի ինքնիշխանությանն ու տարածքային ամբողջականությանը: Ուստի, կայուն խաղաղություն հաստատելու համար Հայաստանի հիմնական օրենքը պետք է համապատասխանեցվի երկու երկրների կողմից արդեն նախաստորագրված խաղաղության համաձայնագրի տեքստին և ոգուն», - ասել է Ամիրբեկովը։
Ըստ նրա՝ համաձայնագրի նախաստորագրումը ինքնին զգալի առաջընթաց է։ Սա երկկողմ կառուցողական երկխոսության, երկու կողմերի քաղաքական կամքի, ինչպես նաև մի շարք միջազգային գործընկերների կառուցողական աջակցության արդյունք է։
Ամիրբեկովը բարձր է գնահատել ԱՄՆ նախագահ Դոնալդ Թրամփի անձնական ներդրումն ու ջանքերը։
«Եթե այս գործընթացը շարունակվի լրջորեն և վճռականորեն, ապա կարող է նոր էջ բացվել Հարավային Կովկասի պատմության մեջ՝ հիմնված համագործակցության, կայունության և ընդհանուր բարեկեցության վրա»,- ընդգծել է նա։
