Միջազգային

Պուտինը Զելենսկուն Մոսկվա է հրավիրել քննարկումների, այլ ոչ թե կապիտուլյացիայի. Պեսկով

ՌԴ նախագահի մամուլի խոսնակ Դմիտրի Պեսկովը անդրադարձել է ռուս-ուկրաինական հակամարտությանը, Վլադիմիր Պուտինի և Դոնալդ Թրամփի հարաբերություններին։

Radar Armenia-ն ներկայացնում է նրա հայտարարությունների հիմնական կետերը․

- Պուտինը Ուկրաինայի նախագահ Վլադիմիր Զելենսկուն հրավիրել է Մոսկվա՝ «քննարկումների համար, այլ ոչ թե կապիտուլյացիայի»։

- Ուկրաինական հակամարտության կարգավորման գործընթացը շարունակվում է, սակայն դրա ավարտի ժամկետների մասին խոսելը դեռ վաղ է։ «Նախագահ Պուտինն ասել է, որ թունելի վերջում լույս կա»,- նշել է Պեսկովը։

- Ռուսաստանը պատրաստ է խաղաղ ճանապարհով հասնել Ուկրաինայի վերաբերյալ իր նպատակներին, սակայն նման հնարավորության բացակայության դեպքում կշարունակի հատուկ ռազմական գործողությունը։

- ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև հնարավոր նոր զրույցի վերաբերյալ դեռևս մանրամասներ չկան։ «Առայժմ որևէ նախապատրաստություն չկա»,- ասել է Պեսկովը։

- Պուտինի և Թրամփի զրույցները բարդ են, քանի որ յուրաքանչյուրը պաշտպանում է իր երկրի շահերը։ «Դրանք հեշտ զրույցներ չեն։ Յուրաքանչյուրը պաշտպանում է իր երկրի շահերը։ Սակայն Պուտինը բարձր է գնահատում դա։ Նա երախտապարտ է Թրամփին այդ մոտեցման համար»,- նշել է Պեսկովը։

- Պուտինը բարձր է գնահատում Թրամփի խաղաղ ջանքերը և նրանց հարաբերությունների կառուցողական բնույթը։

- Կրեմլը Թրամփին ընկալում է բացառապես որպես ԱՄՆ նախագահ՝ առանց լրացուցիչ սուբյեկտիվ գնահատականների։ «Թրամփը մեզ համար Ամերիկայի Միացյալ Նահանգների նախագահն է»,- ընդգծել է Պեսկովը։

- Ռուսաստանը և ԱՄՆ-ն կապեր են պահպանում տարբեր ուղղություններով՝ Կրեմլի և Սպիտակ տան, ինչպես նաև հատուկ ծառայությունների միջև։ Այնուամենայնիվ, դրանք դեռևս չեն հանգեցրել երկու երկրների հարաբերությունների համապարփակ վերականգնման։

- Ռուսաստանի և ԱՄՆ-ի հարաբերությունները խիստ տուժել են նախորդ ամերիկյան վարչակազմի օրոք, և դրանց վերականգնումը ժամանակ կպահանջի։ «Մեր հարաբերությունների լիակատար անշարժությունից դուրս գալու գործընթացը ժամանակ կպահանջի։ Կա բացասական իներցիա։ Մեր երկկողմ հարաբերությունների ողջ կառուցվածքին չափազանց լուրջ վնաս է հասցվել»,- նշել է Պեսկովը։

- Ռուսաստանը և ԱՄՆ-ն դեռևս չեն հասել մշակույթի և սպորտի ոլորտներում կապերի վերականգնմանը։ «Այդ փուլին դեռ չենք հասել»,- ասել է նա։