Միջազգային
Ես կարծում էի, որ Ռուսաստանի հետ կապված հարցը կլինի ամենահեշտ լուծվողներից. Թրամփ
ԱՄՆ նախագահ Դոնալդ Թրամփը CBS News-ին հայտարարել է, որ շարունակում է հավատարիմ մնալ Ռուսաստանի և Ուկրաինայի միջև խաղաղության համաձայնագրի ձեռքբերման քաղաքականությանը։
Թրամփը իր դիրքորոշումը նկարագրել է որպես իրատեսական և լավատեսական՝ ընդգծելով, որ բանակցությունների այս կարևոր փուլում ուշադիր հետևում է երկու առաջնորդների քայլերին։ «Ես հետևում եմ, տեսնում եմ և խոսում եմ այդ մասին Պուտինի և Զելենսկու հետ», – նշել է նա՝ հավելելով. «Ինչ-որ բան տեղի կունենա, բայց նրանք դեռ պատրաստ չեն։ Սակայն ինչ-որ բան անպայման տեղի կունենա։ Մենք դա կիրականացնենք»։
Նրա խոսքով՝ Ռուսաստան–Ուկրաինա հակամարտությունը ավելի բարդ է, քան մյուս հակամարտությունները, որոնց կարգավորմանը ինքը մասնակցել է։ «Ես կարծում էի, որ Ռուսաստանի հետ կապված հարցը կլինի ամենահեշտ լուծվողներից, բայց այն, կարծես, ավելի բարդ է որոշ այլ հակամարտություններից», – ասել է Թրամփը։
Նա նաև ընդգծել է, որ իր դիվանագիտական մոտեցման հիմքը տարբեր հակամարտող երկրների առաջնորդներին մեկ սենյակում հավաքելն է և իրական ժամանակում համաձայնության գալը՝ հաճախ իր անմիջական մասնակցությամբ։ Թրամփի խոսքով՝ այս մեթոդը պահանջում է համբերություն, նույնիսկ եթե սպասվում է արագ լուծում, սակայն այն արդեն արդյունք է տվել այս տարվա մի շարք խաղաղության համաձայնագրերում։
Հարցին, թե արդյոք երբեմն պետք է «սպասել», Թրամփը պատասխանել է. «Այո, դա անհրաժեշտ է»։ Նա հավելել է. «Մենք ունեցել ենք շատ հաջող օրեր, և երբ ես նրանց հավաքում եմ մեկ սենյակում կամ գոնե ստիպում եմ միմյանց հետ խոսել, նրանք գտնում են լուծումներ։ Մենք փրկել ենք միլիոնավոր կյանքեր»։
Անցյալ ամիս՝ Ալյասկայում Պուտինի հետ նախատեսվող հանդիպումից առաջ, Թրամփը լրագրողներին ասել էր. «Ես պարզապես ուզում եմ հիմք դնել հաջորդ հանդիպման համար, որը պետք է կայանա շուտով»։
