Միջազգային
Մեկնարկել ՇՀԿ գագաթնաժողովը. Ծինփինը կոչ է արել օգտագործել մեգա-շուկայի առավելությունները
Չինաստանի նախագահ Սի Ծինփինը երկուշաբթի օրը Շանհայի համագործակցության կազմակերպության (ՇՀԿ) գագաթնաժողովում կոչ է արել անդամ պետություններին առավել արդյունավետ օգտագործել իրենց «մեգա-մասշտաբի շուկան»։ Նա ընդգծել է համաշխարհային անվտանգության և տնտեսական նոր կարգի ձևավորման իր տեսլականը, ինչը դիտարկվում է որպես մարտահրավեր Միացյալ Նահանգներին։
ՇՀԿ-ն դարձել է «միջազգային հարաբերությունների նոր տիպի օրինակ», նշել է Սին՝ ելույթ ունենալով Չինաստանի հյուսիսային Տյանցզին նավահանգստային քաղաքում մեկնարկած երկօրյա գագաթնաժողովի բացման ժամանակ։ Նրա խոսքերը հնչել են ավելի քան 20 համաշխարհային առաջնորդների ներկայությամբ։
«Մենք պետք է խթանենք հավասար և կարգավորված բազմաբևեռացումը, ապահովենք ներառական տնտեսական գլոբալիզացիա և նպաստենք ավելի արդար ու հավասարակշռված գլոբալ կառավարման համակարգի կառուցմանը»,- հայտարարել է Չինաստանի ղեկավարը։
Նա նաև նշել է, որ Չինաստանը այս տարի ՇՀԿ անդամներին կհատկացնի 2 միլիարդ յուան (մոտ 280 միլիոն դոլար) անվճար օգնություն, ինչպես նաև 10 միլիարդ յուանի վարկեր՝ կազմակերպության բանկային կոնսորցիումի միջոցով։
«Մենք պետք է օգտագործենք մեր մեգա-շուկայի առավելությունները՝ առևտրի և ներդրումների դյուրացման մակարդակը բարձրացնելու համար»,- ընդգծել է նա։ Ծինփինը կոչ է արել խորացնել համագործակցությունը էներգետիկայի, ենթակառուցվածքների, գիտության ու տեխնոլոգիաների, ինչպես նաև արհեստական բանականության ոլորտներում։
Գագաթնաժողովի բացման արարողությանը ներկա են եղել Ռուսաստանի նախագահ Վլադիմիր Պուտինը, Հնդկաստանի վարչապետ Նարենդրա Մոդին, ինչպես նաև Կենտրոնական Ասիայի, Մերձավոր Արևելքի, Հարավային և Հարավարևելյան Ասիայի այլ երկրների ղեկավարներ՝ ի նշան Համաշխարհային Հարավի համերաշխության։
