Օգոստոսի 31-ին Չինաստանի Տյանցզին քաղաքում Ադրբեջանի նախագահ Իլհամ Ալիևը հանդիպել է Չինաստանի նախագահ Սի Ծինպինի հետ։
Ինչպես հայտնում են ադրբեջանական ԶԼՄ-ները, Չինաստանի նախագահը շնորհակալություն է հայտնել իր հրավերն ընդունելու և «ՇՀԿ Պլյուս» գագաթնաժողովին, ինչպես նաև ֆաշիզմի դեմ հաղթանակի 80-ամյակին նվիրված հանդիսավոր միջոցառումներին և զորահանդեսին մասնակցելու համար։
Սի Ծինպինն ընդգծել է, որ Ադրբեջանն ու Չինաստանը ավելի քան 30 տարվա ընթացքում հաջող համագործակցություն են կառուցել, և ներկայումս երկկողմ կապերը զարգանում են համապարփակ ռազմավարական գործընկերության մակարդակով։
ՉԺՀ նախագահը նշել է, որ ադրբեջանա-չինական համագործակցությունը ամրապնդվում է նաև «Մեկ գոտի, մեկ ճանապարհ» նախագծի շրջանակներում, նշեց չինական ապրանքների Ադրբեջանի տարածքով տեղափոխման կարևորությունը և Տրանսկասպյան երթուղու նշանակությունը։
