Գազայի հարավում, Խան Յունիսի Նասեր հիվանդանոցի վրա Իսրայելի իրականացրած կրկնակի հարվածների հետևանքով զոհվել է առնվազն 20 մարդ, այդ թվում՝ լրագրողներ և բուժաշխատողներ։
Իսրայելը միջադեպը որակել է «ողբերգական»։ Վարչապետ Բենյամին Նեթանյահուն հայտարարել է, որ Իսրայելը «խորապես ափսոսում է» տեղի ունեցածի համար, ընդգծելով, որ զինվորականները «ամենայն մանրամասնությամբ հետաքննություն են անցկացնում»։
Նասեր հիվանդանոցի բուժաշխատողների փոխանցմամբ, առաջին հարվածը տեղի է ունեցել տեղական ժամանակով առավոտյան ժամը 10-ի սահմաններում։ Այդ պահին զոհվել է առնվազն մեկ մարդ։ Մի քանի րոպե անց հասցված երկրորդ հարվածը խոցել է դեպքի վայր հասած փրկարարներին ու լրագրողներին՝ առաջացնելով զանգվածային խուճապ։
«Զանգվածային խուճապ սկսվեց...լիակատար քաոս»,– BBC-ի թղթակիցներին պատմել է բրիտանացի բուժաշխատողը, որը դեպքի պահին գտնվում էր հիվանդանոցում և օգնություն էր ցուցաբերում վերակենդանացման բաժանմունքի հիվանդներին։ Նրա խոսքով՝ մոտ 10 րոպե անց, երբ անձնակազմը պատրաստվում էր տարհանել շենքը, տեղի է ունեցել երկրորդ պայթյունը։
Հարվածի հետևանքով զոհված լրագրողներից հինգը աշխատում էին միջազգային լրատվամիջոցների համար, այդ թվում՝ Associated Press, Reuters, Al Jazeera և Middle East Eye։
Իսրայելի պաշտպանության բանակը հաստատել է, որ հարված է հասցրել Գազայի հարավում՝ Նասեր հիվանդանոցի շրջակայքում։
