Միջազգային
Ամերիկացիները գալիս են ընկերության անվան տակ, իսկ հետո այլ բան են փնտրում. Փեզեշքյան
Իրանական SNN հեռուստաալիքի հաղորդմամբ՝ Իրանի նախագահ Մասուդ Փեզեշքյանը Թեհրանի Մեհրաբադ օդանավակայանում, Հայաստան և Բելառուս մեկնելուց առաջ, մի քանի կարևոր հայտարարություն է արել։
«Այս ուղևորությունը համապատասխանում է հարևան երկրների հետ մեզ համար առաջնահերթ ուղևորություններին։ Բնականաբար, ելնելով ընդհանուր քաղաքականությունից և գերագույն առաջնորդի կարծիքից, մեր հարևանները հարաբերությունների հաստատման և զարգացման համար առաջնահերթություն են»,- ասել է նա։
Իրանի նախագահն ընդգծել է, որ երկիրը վաղեմի և ռազմավարական հարաբերություններ ունի հարևան և բարեկամ Հայաստանի հետ. «Միշտ փորձել ենք լավ հարաբերություններ պահպանել միմյանց հետ սոցիալական, քաղաքական, տնտեսական և մշակութային հարցերում: Հաստատվել և ստեղծվել են անհրաժեշտ պայմանները՝ Իրանի և Հայաստանի միջև հնարավորինս շատ կոմունիկացիաներ հաստատելու համար: Հետևաբար, այս այցի ընթացքում կքննարկենք մեր համաձայնագրերն ու հարաբերությունները, այդ թվում՝ հաղորդակցության և մշակութային ուղիները, որոնք կարող են լուծում լինել՝ ամրապնդելու համար, մասնավորապես, Հյուսիս-Հարավ միջանցքը»,- հայտարարել է Իրանի նախագահը։
Նա խոսել է նաև Արևելք-Արևմուտք կոմունիկացիոն ուղու մասին և այն հարմար հարթակ համարել Արևելք-Արևմուտք առևտրի ապահովման և հարաբերությունների զարգացման համար․ «Մենք ձգտում ենք ընդլայնել այն»,- ասել է Փեզեշքյանը։
Խոսելով Հայաստանի և Ադրբեջանի միջև խաղաղության համաձայնագրի կնքումից հետո Հայաստանում ամերիկյան ընկերությունների ներկայության հետ կապված մտահոգությունների մասին՝ Փեզեշքյանն ասել է. «Բնականաբար, անհանգստություն և մտահոգություն կա տարածաշրջանում ամերիկյան ընկերությունների ներկայության վերաբերյալ, որոնք գալիս են ընկերության անվան տակ, իսկ հետո՝ այլ բան փնտրում։ Մինչ այժմ փորձը ցույց է տվել, որ նրանք մտնում են այս ճանապարհով, և մենք քննարկումներ կունենանք հայ պաշտոնյաների հետ այս մտահոգությունների և անհանգստությունների շուրջ»։
Ըստ Իրանի նախագահի՝ այսօր Երևանում նախատեսվում է ստորագրել շինարարության, հանքարդյունաբերության, արվեստի, սոցիալական և զբոսաշրջության ոլորտներում շատ լավ փաստաթղթեր։
