Միջազգային
Մոտ ապագայում Փեզեշքյանի այցը Հայաստան նոր էջ կբացի երկրների հարաբերություններում. Իրանի փոխնախագահ
Հայաստանն իր ուրույն տեղն ունի Իրանի բարիդրացիության քաղաքականության մեջ, իսկ Թեհրանի և Երևանի հարաբերությունները կառուցված են ամուր և անխախտ պատմամշակութային և քաղաքակրթական հիմքերի վրա. ինչպես փոխանցում է IRNA գործակալությունը, այս մասին հայտարարել է Իրանի առաջին փոխնախագահ Մոհամմադ Ռեզա Արեֆը՝ Հայաստանի նախագահ Վահագն Խաչատուրյանի հետ հանդիպման ընթացքում
Նա նշել է, որ երկու երկրների պաշտոնյաների միջև խորհրդակցությունները բավարար մակարդակի վրա են։
Խոսելով Հայաստան այցի և Եվրասիական միության գագաթնաժողովին մասնակցելու, ինչպես նաև՝ երկկողմ խորհրդակցությունների մասին, առաջին փոխնախագահը նշել է. «Մենք նախաձեռնել ենք արժեքավոր համաձայնագրեր և միջոցառումներ, որոնք համապատասխանում են տարբեր ոլորտներում երկու երկրների ընդհանուր շահերին, ներառյալ՝ տրանսպորտը, էներգետիկան, ենթակառուցվածքները, առևտուրը, գյուղատնտեսությունը, գիտությունն ու տեխնոլոգիաները, կրթությունը, մշակույթը և հասարակայնության հետ կապերը, որոնք պետք է քայլ առ քայլ խորացնենք»:
Նա ողջունել է տարածաշրջանում և հարևանների միջև խաղաղության բանակցությունները, ինչպես նաև՝ բանակցությունների միջոցով վեճերի լուծումը։
«Մենք ողջունում ենք տարածաշրջանում հարևանների միջև տևական խաղաղության և կայունության հաստատումը և գտնում ենք, որ խաղաղությունը բխում է տարածաշրջանի բոլոր երկրների շահերից, և տարածաշրջանային խնդիրների լուծումը պետք է իրականացվի առանց օտարերկրյա պետությունների միջամտության»,- ընդգծել է նա։
Նա հավելել է, որ Իրանի սկզբունքային մոտեցումն է՝ աջակցել բարեկամ երկրների անդամակցությանը տարածաշրջանային կազմակերպություններին, և Իրանն աջակցում է Հայաստանի անդամակցությանը Շանհայի համագործակցության կազմակերպությանը:
Առաջին փոխնախագահը բարձր է գնահատել Իրանի և Իսրայելի միջև վերջերս տեղի ունեցած բախման ժամանակ Հայաստանի կառավարության և ժողովրդի ցուցաբերած համակրանքը. «Մենք վստահ ենք, որ նախագահ Փեզեշքյանի այցը Հայաստան կհանգեցնի երկու երկրների հարաբերությունների ընդլայնմանն ու խորացմանը և նոր էջ կբացի երկու երկրների հարաբերություններում»,- ասել է նա։
