Ադրբեջանի ԱԳՆ-ի նախազգուշացումից հետո, որը վերաբերում էր ТАСС-ի՝ «Ստեփանակերտում քանդեցին Այվազովսկու հուշարձանը» նյութի վերնագրի ձևակերպմանը, գործակալությունը վերանայել է այն՝ «Ստեփանակերտ» բառը փոխարինելով «Լեռնային Ղարաբաղով»։
Ադրբեջանի ԱԳՆ ներկայացուցիչ Այխան Հաջիզադեն այս հրապարակումից հետո արձագանքել է կիսանդրու քանդման հարցով Ռուսաստանի նախագահի հատուկ ներկայացուցիչ Միխայիլ Շվիդկոյի հայտարարությանը, որն այս գործողությունը որակել էր ցավալի և անընդունելի։
Շվիդկոյը ընդգծել էր, որ եթե Այվազովսկու հուշարձանը որևէ պատճառով չբավարարեր ադրբեջանական կողմին, Բաքուն կարող էր Մոսկվային տեղեկացնել այն քանդելու իր մտադրության մասին։
«Հարցը, վստահ եմ, կլուծվեր քաղաքակիրթ ձևով, օրինակ, այն ռուսական հող տեղափոխելով։ Փոխարենը, դա Ռուսաստանի դեմ ցուցադրական ոչ բարեկամական գործողություն է», - ասել էր նա իր հայտարարության մեջ, որը հրապարակվել էր ռուսական ТАСС-ով։
Սրան անմիջապես արձագանքած Այխան Հաջիզադեն էլ հայտարարել էր, որ հայազգի նկարիչ Հովհաննես Այվազովսկու կիսանդրու տեղադրումն՝ առանց ադրբեջանական կողմի թույլտվության, անօրինական է եղել. «Դա Ռուսաստանի կողմից Ադրբեջանի ինքնիշխանության նկատմամբ անհարգալից վերաբերմունքի դրսևորում է եղել։ Տրամաբանական, ճիշտ և օրինական է ապամոնտաժել նման հուշարձանները, որոնք ապօրինաբար տեղադրվել են ադրբեջանական տարածքների օկուպացիայի ժամանակ»- ասել է Հաջիզադեն:
