ԱՄՆ-ի և Չինաստանի բարձրաստիճան պաշտոնյաները երկուշաբթի օրը Ստոկհոլմում ավելի քան հինգ ժամ տևողությամբ բանակցություններ են անցկացրել՝ նպատակ ունենալով լուծել աշխարհի երկու խոշորագույն տնտեսությունների միջև առևտրային վեճերը և կանխել առևտրային պատերազմի սրացումը, հայտնում է Reuters-ը։
ԱՄՆ-ի գանձապետարանի ղեկավար Սքոթ Բեսենթը մասնակցել է բանակցային խմբին, որը կեսօրին ժամանել է Շվեդիայի վարչապետի Ռոզենբադ գրասենյակ։ Հանդիպմանը ներկա է եղել նաև Չինաստանի փոխվարչապետ Հի Լիֆենը։
Չինաստանը պետք է մինչև օգոստոսի 12-ը ԱՄՆ նախագահ Դոնալդ Թրամփի վարչակազմի հետ կնքի մաքսային համաձայնագիր։ Կողմերը մայիսին և հունիսին ձեռք էին բերել նախնական պայմանավորվածություններ՝ դադարեցնելու փոխադարձ մաքսատուրքերի բարձրացումը և հազվագյուտ հանքանյութերի մատակարարման սահմանափակումը։
Բանակցողները երեկոյան 20:00-ին լքել են գրասենյակը՝ առանց լրագրողների հետ խոսելու։ Բանակցությունները կշարունակվեն երեքշաբթի օրը։
«Ես կցանկանայի, որ Չինաստանը բացի իր տնտեսությունը», - ասել է Թրամփը Շոտլանդիայում։
Առանց համաձայնագրի՝ համաշխարհային մատակարարման շղթաները կարող են խաթարվել, քանի որ ԱՄՆ-ը կարող է վերականգնել եռանիշ մաքսատուրքեր՝ փաստացի հաստատելով երկկողմ առևտրային էմբարգո։
ԱՄՆ-ի առևտրի ներկայացուցիչ Ջեյմիսոն Գրիրը CNBC-ին հայտնել է. «Ստոկհոլմի բանակցություններից մեծ առաջընթաց չեմ ակնկալում։ Կենտրոնանալու ենք նախկին համաձայնությունների կատարման վերահսկման, կարևոր հանքանյութերի մատակարարման ապահովման և հավասարակշռված առևտրի հիմքեր ստեղծելու վրա»։
Բանակցությունները տեղի են ունենում Թրամփի՝ Եվրոպական միության հետ ձեռք բերված համաձայնությունից հետո. նախատեսում է ԵՄ-ից ԱՄՆ արտահանվող ապրանքների համար 15% մաքսատուրք։
