Չինաստանի Շաոլինի բուդդայական վանքի առաջնորդ Շի Յունսինի նկատմամբ սկսվել է պաշտոնական հետաքննություն։ Նրան մեղադրում են ֆինանսական յուրացումների և անբարո վարքի մեջ։
Շաբաթավերջին WeChat սոցիալական հարթակում հրապարակված հայտարարության մեջ նշվում է, որ Շի Յունսինի գործունեությունը այժմ քննության առարկա է մի քանի պետական գերատեսչությունների կողմից։ Ըստ հաղորդագրության՝ նա կասկածվում է վանքի ֆինանսական միջոցների և տարբեր ծրագրերի համար տրամադրված գումարների յուրացման, ինչպես նաև բուդդայական վարքականոններին հակասող կենսակերպի՝ մի քանի կանանց հետ համակեցության և արտամուսնական երեխաների հայր լինելու մեջ։
Երկուշաբթի առավոտյան Շի Յունսինի ձերբակալության մասին լուրերը դարձել են ամենաքննարկվող թեման չինական Weibo սոցիալական ցանցում։
Շի Յունսինը Weibo-ում ունի շուրջ 880,000 հետևորդ։ Նրա էջում նախկինում պարբերաբար հրապարակվում էին բուդդայական ուսմունքների վերաբերյալ գրառումներ, սակայն հուլիսի 24-ից հետո էջը չի թարմացվել։
Շաոլին վանքը, որ հիմնադրվել է մոտ 1500 տարի առաջ, համարվում է դզեն բուդդիզմի և կունգ-ֆու մարտարվեստի (ուշու) ամենահայտնի կենտրոններից մեկը։ Այն հայտնի է ոչ միայն իր կրոնական ավանդույթներով, այլ նաև արևելյան մարտարվեստի վերաբերյալ հոնկոնգյան ու ամերիկյան ֆիլմերում հաճախ հիշատակվելով։ Վանքը գտնվում է Հենանի նահանգի լեռներում և տարեկան հազարավոր այցելուներ է ընդունում թե՛ Չինաստանից, թե՛ արտասահմանից։
Շի Յունսինը վանական գործունեություն է սկսել Շաոլինում 1982 թվականին, իսկ 1999 թվականից նշանակվել է վանքի առաջնորդ։
