Politico-ի տեղեկություններով՝ ԱՄՆ նախագահ Դոնալդ Թրամփը, ինչպես իր առաջին ժամկետում, խախտելով դիվանագիտական կանոնները, անձամբ իր հեռախոսահամարը տալիս է օտարերկրյա ղեկավարներին և նրանց հետ անմիջական կապի է դուրս գալիս։
Ֆրանսիայի նախագահ Էմանուել Մակրոնը, Բրիտանիայի վարչապետ Քիր Սթարմերը և Սաուդյան Արաբիայի արքայազն Մուհամեդ բին Սալմանը ամենահաճախակի շփվողների թվում են։
Հատկապես ջերմ հարաբերություններ են ձևավորվել Ֆրանսիայի նախագահ Էմանուել Մակրոնի հետ․ նրանց զրույցները հաճախ անցնում են անմիջական տոնով։
Սթարմերն անգամ WhatsApp-ով է շփվել Թրամփի հետ՝ փորձելով վերականգնել հարաբերությունները Ուկրաինայի նախագահի հետ հանդիպումից հետո։ Հուլիսի 29-ին նրանք Շոտլանդիայում գոլֆի խաղ են նախատեսել՝ «ավելի անձնական կապ հաստատելու համար»։
Նման ոչ պաշտոնական ոճը, ըստ եվրոպացի պաշտոնյաների, օգնում է Թրամփի հետ հարաբերություններում․ Նիդեռլանդներում կայացած ՆԱՏՕ-ի գագաթնաժողովում Թրամփն անգամ հայտարարել էր, որ «մեծ առաջնորդների» հետ հանդիպումներից հետո փոխել է իր կարծիքը դաշինքի մասին։
