Ուկրաինայի նախագահ Վոլոդիմիր Զելենսկին Գերագույն ռադա է ներկայացրել հակակոռուպցիոն մարմինների մասին օրենքի նոր նախագիծ։ Նա խոստացել է, որ փաստաթուղթը կապահովի Ուկրաինայի Հակակոռուպցիոն ազգային բյուրոյի (НАБУ) և Հակակոռուպցիոն մասնագիտացված դատախազության (САП) անկախությունը։ Երկու մարմիններն էլ հայտարարել են, որ օրինագիծը կվերականգնի նրանց անկախության երաշխիքները։
Զելենսկին հայտարարել է, թե նոր օրինագծի տեքստը հավասարակշռված է։
«Համաձայնեցրել եմ օրինագծի տեքստը, որը երաշխավորում է Ուկրաինայում իրավակարգի համակարգի իրական ամրապնդումը, հակակոռուպցիոն մարմինների անկախությունը, ինչպես նաև իրավակարգի համակարգի հուսալի պաշտպանությունը Ռուսաստանի ցանկացած ազդեցությունից կամ միջամտությունից»,- գրել է Ուկրաինայի նախագահը Telegram-ում։
Մի քանի ժամ անց օրինագիծն իսկապես ներկայացվել է Ռադա։
Ուկրաինայի խորհրդարանի խոսնակ Ռուսլան Ստեֆանչուկը խոստացել է, որ օրինագիծը կքննարկվի «հաշվառման ժամկետից զգալիորեն շուտ», չնայած պատգամավորները մինչև օգոստոսի վերջ գտնվում են արձակուրդում։
