Միջազգային
Ֆրանսիան կդառնա «Մեծ յոթնյակի» առաջին երկիրը, որ կճանաչի Պաղեստինը. CNN
Ֆրանսիայի նախագահ Էմանուել Մակրոնը անակնկալ հայտարարությամբ հայտնել է, որ երկիրը սեպտեմբերին կճանաչի Պաղեստինի պետականությունը։ Այս մասին հաղորդում է CNN-ը՝ վկայակոչելով Ելիսեյան պալատի բարձրաստիճան աղբյուրներ։
Ֆրանսիան փաստացի կդառնա ՄԱԿ-ի ԱԽ առաջին մշտական անդամ երկրիրը և «Մեծ յոթնյակի» առաջին երկիրը, որ կճանաչի Պաղեստինը՝ միանալով Իռլանդիայի, Նորվեգիայի և Իսպանիայի օրինակին։
Հաղորդման համաձայն, այս որոշումը պայմանավորված է Գազայի խորացող հումանիտար ճգնաժամով։ CNN-ը նշում է, որ միայն մայիսից ի վեր ավելի քան 1,000 գազացիներ զոհվել են սննդի որոնման ընթացքում, իսկ տասնյակները՝ սովից։
Համեմատելով իրավիճակը 20-րդ դարի մռայլ էջերի հետ՝ ֆրանսիական կողմը կարծում է, որ հիմա է ժամանակը գործելու։ Ֆրանսիայի բարձրաստիճան պաշտոնյաներից մեկը CNN-ին հայտնել է․ «Ես համոզված եմ, որ սեպտեմբերին մենք միակ պետությունը չենք լինելու, որ կճանաչի Պաղեստինը»։
Միջազգային արձագանք
Ֆրանսիայի որոշումը ողջունել է Համասը՝ անվանելով այն «դրական քայլ», սակայն Իսրայելի վարչապետ Բենիամին Նեթանյահուն հայտարարել է, որ այն «հատուցում է ահաբեկչությանը»։ ԱՄՆ պետքարտուղար Մարկո Ռուբիոն գրել է, որ «այս անպատասխանատու քայլը հարված է հոկտեմբերի 7-ի զոհերին»։
Գործնական հետևանքներ
Չնայած միջազգային կարևորությանը, որոշումը քիչ բան կփոխի գետնի վրա։ Գազայում մարդկանց 100%-ը սննդի անվտանգության ռիսկի տակ է, իսկ ըստ ՄԱԿ-ի տվյալների՝ շուրջ 900,000 երեխա սովի եզրին է։
Դիվանագիտություն
CNN-ը ենթադրում է, որ Մակրոնը փորձում է ճնշում գործադրել դաշնակիցների վրա՝ ստիպելով նրանց հետևել Ֆրանսիայի օրինակին։ Ի սկզբանե Ֆրանսիան նախատեսում էր համատեղ գագաթնաժողով Սաուդյան Արաբիայի հետ, սակայն Իրան-Իսրայել պատերազմը ձախողեց այդ նախաձեռնությունը։
Ֆրանսիայի պատմական դիրքորոշումը
Ֆրանսիան երկար տարիներ հանդես է եկել երկու պետություն լուծման օգտին։ 2014-ին խորհրդարանը կոչ էր արել ճանաչել Պաղեստինը, իսկ այժմ Ելիսեյան պալատը հստակ քայլի է դիմում՝ առանց սահմանների մասին հստակեցման։
Մակրոնը սկզբում սատարել է Իսրայելի պատասխանը հոկտեմբերի 7-ի դեպքերին, սակայն հետագայում մեծացրել է քննադատությունը՝ արգելելով զենքի արտահանումն Իսրայել և կոչ անելով հրադադարի։
