Չինաստանի նախագահ Սի Ծինպինը Եվրամիության ղեկավարներին կոչ է արել կատարել «ճիշտ ռազմավարական ընտրություններ»՝ ընդգծելով Չինաստանի և Եվրամիության համագործակցության կարևորությունը միջազգային բարդ իրավիճակում. հաղորդում են Չինաստանի պետական լրատվամիջոցները։
Պեկինում Սի Ծինպինը և վարչապետ Լի Ցյանը հանդիպել են Եվրոպական հանձնաժողովի նախագահ Ուրսուլա ֆոն դեր Լյայենի և Եվրոպական խորհրդի նախագահ Անտոնիո Կոստայի հետ։
«Որքան ավելի բարդ և խրթին դառնա միջազգային միջավայրը, այնքան առավել է անհրաժեշտ, որ Չինաստանն ու Եվրամիությունը ուժեղացնեն հաղորդակցությունը, խորացնեն փոխադարձ վստահությունը և ընդլայնեն համագործակցությունը»,- հայտարարել է Սի Ծինպինը։ «Չինաստանի և Եվրոպայի ղեկավարները պետք է կայացնեն ճիշտ ռազմավարական ընտրություններ, որոնք կարտացոլեն ժողովուրդների սպասումները»,- հավելել է նա։
Նշենք, որ գագաթնաժողովից առաջ շաբաթները նշանավորվել են Չինաստանի և ԵՄ-ի միջև առևտրային տարաձայնություններով և եվրոպացի բարձրաստիճան պաշտոնյաների կոշտ հայտարարություններով։
