Ըստ Al Hadath և Al Arabiya պարբերականների աղբյուրների, Սիրիայի վարչակազմի և Իսրայելի միջև անվտանգության ոլորտում հաղորդակցությունը վերսկսվել է՝ ԱՄՆ-ի և Թուրքիայի անմիջական մասնակցությամբ։
Նշվում է, որ Թուրքիան և Սիրիան ակտիվ բանակցություններ են վարում Սիրիայի դեմոկրատական ուժերի (ՍԴՈւ), ինչպես նաև երկրի ներսում գործող դավանանքային խմբերի՝ դրուզների ու ալևիների հետ կապված հարցերի շուրջ։ Զուգահեռաբար ընթանում են բանակցություններ նաև Իսրայելի հետ փոխըմբռնման հաստատման ուղղությամբ։
Al Hadath-ի տվյալներով՝ իսրայելական պատվիրակություն ուղևորվել է Ադրբեջան՝ բանակցությունները եզրափակելու նպատակով, իսկ Սուվեյդայի խնդիրը «լուծման ճանապարհին է»։
Աղբյուրները հայտնել են, որ Դամասկոսը զարմացած է եղել Իսրայելի արձագանքով Սուվեյդայում տեղի ունեցող վերջին բախումներին։
Նշվում է նաև, որ Իսրայելը չի պարտավորվել դադարեցնել հարվածները Սիրիայի տարածքում և պահանջում է ստեղծել ապառազմականացված գոտի՝ 1974 թ․ հրադադարի գծի երկայնքով։
Այդ գոտին՝ ընդհանուր 235 քառակուսի կիլոմետր մակերեսով, ունի մոտ 80 կմ երկարություն և 500 մետրից մինչև 10 կմ լայնություն, և ընկած է օկուպացված Գոլանի բարձունքները Սիրիայի մնացած տարածքից բաժանող գծի երկայնքով։
