Միջազգային
Կոբախիձեն Իվանիշվիլիին ուղղված Ռուբիոյի նամակը կապել է «խորքային պետության» հետ
Վրաստանի վարչապետ Իրակլի Կոբախիձեն պնդում է, որ կառավարությունը չգիտի, թե ով է կանգնած այն հաղորդագրության ետևում, որ «Վրացական երազանքի» հիմնադիր Բիձինա Իվանիշվիլին հրաժարվել է հանդիպել ԱՄՆ դեսպան Ռոբին Դանիգանի հետ, որից նա պետք է ստանար Թրամփի վարչակազմի ուղերձը։
Ինչպես ավելի վաղ հայտնել էր ԱՄՆ դեսպանատունը, պետքարտուղար Ռուբիոյի խնդրանքով դեսպան Դանիգանը խնդրել է հանդիպել Բիձինա Իվանիշվիլիի հետ մայիսի 22-ին՝ նրան տեղեկացնելու վարչակազմի ուղերձի մասին։ Կոբախիձեն այս հայտարարությունը կապել է «խորքային պետության» հետ։
«Ինչ վերաբերում է ամերիկյան հաղորդագրությանը, մենք ճշգրիտ չգիտենք, թե որ հասցեից է այն եկել, և տիկին Դանիգանի անմիջական կապերի հիման վրա մենք կասկածում ենք, որ այս հաղորդագրությունը եկել է Պետդեպարտամենտի հենց այն ստորաբաժանումից, որը դեռևս գտնվում է «խորքային պետության» ազդեցության տակ», - «Ռուսթավի 2» հեռուստաալիքի եթերում ասել է Կոբախիձեն։
Դեսպան Ռոբին Դանիգանը հուլիսի 3-ին «Ազատություն» ռադիոկայանի վրացական ծառայությանը հայտնել է, որ ցանկանում է անձամբ հանդիպել Բիձինա Իվանիշվիլիի հետ՝ փոխանցելու պետքարտուղար Մարկո Ռուբիոյի պատասխանը «Վրացական երազանքի» ղեկավարության նամակին։
Իրակլի Կոբախիձեն պնդել է, որ «Վրացական երազանքի» «խորքային պետության հետ կապերի» տրամաբանությունը հաստատվում է այն փաստով, որ հաղորդագրությունը ուղղված էր միայն Բիձինա Իվանիշվիլիին, որը պատժամիջոցների տակ է։
«Պարոն Բիձինա Իվանիշվիլին շանտաժի տակ է։ Նա վարչապետ չէ։ Մեր տրամաբանությամբ՝ կոնկրետ մարդիկ՝ «խորքային պետության» ներկայացուցիչները, ցանկանում էին այս հաղորդագրությունը փոխանցել շանտաժի ենթարկվող անձին։ Սրա համար այլ բացատրություն չկա», - ասել է Կոբախիձեն։
