Աշխարհում գործող ամենատարեց նախագահ Պոլ Բիան, որն արդեն 92 տարեկան է, հայտարարել է, որ կրկին կմասնակցի Կամերունում հոկտեմբերին կայանալիք նախագահական ընտրություններին։
«Վստահ եղեք, որ ձեզ ծառայելու վճռականությունս համապատասխանում է մեր առջև ծառացած մարտահրավերների արդիականությանը»,- գրել է նա X-ում։
Բիան արդեն 43 տարի ղեկավարում է Կամերունը։ 1982 թվականից ի վեր նա երբեք չի պարտվել ընտրություններում։ Նրա կառավարությունը բազմիցս քննադատվել է կոռուպցիայի, վատ կառավարման, անվտանգության խնդիրները չլուծելու և հանրային վստահությունը կորցնելու համար։
Վերջին տարիներին աճում են նրա հրաժարականի կոչերը։
Այս ընտրություններին նա կանգնելու է ավելի բարդ մրցակցության առաջ․ երկու ազդեցիկ նախկին դաշնակիցներ՝ նախկին վարչապետ Բելո Բուբա Մայգարին և նախկին նախարար Իսա Չիրոմա Բակարին, հեռացել են իշխող կոալիցիայից և հայտարարել են իրենց թեկնածություն դնելու մասին։
