Կիրակի օրը հրապարակվել են Գազայի հաշտության առաջարկի նոր մանրամասներ՝ այն պահին, երբ Իսրայելը, վարչապետ Բենյամին Նեթանյահուի՝ Սպիտակ տուն այցելությունից առաջ, բանակցային խումբ է ուղարկել Կատար։
Նախքան այդ՝ Գազայում իսրայելական օդային հարվածների հետևանքով զոհվել է առնվազն 38 պաղեստինցի։
«20 պատանդներ ողջ են, 30-ը՝ մահացած։ Ես վճռական եմ, մենք վճռական ենք՝ բոլորին վերադարձնելու։ Մենք նաև վճռական ենք՝ ապահովելու, որ Գազան այլևս սպառնալիք չներկայացնի Իսրայելի համար»,- ԱՄՆ մեկնելուց առաջ հայտարարել է Նեթանյահուն։
The Associated Press գործակալության աղբյուրների փոխանցմամբ՝ հայտնի են դարձել միջնորդների կողմից ՀԱՄԱՍ-ին ներկայացված հաշտության առաջարկի որոշ մանրամասներ։
Փաստաթուղթը սահմանում է 60-օրյա հաշտության ծրագիր, որի շրջանակում ՀԱՄԱՍ-ը պետք է ազատ արձակի 10 ողջ պատանդ, վերադարձնի 18 մահացածի մարմին, իսկ իսրայելական զորքերը պետք է դուրս բերվեն Գազայի՝ Իսրայելի և Եգիպտոսի հետ սահմաններին հարող բուֆերային գոտուց։ Բացի այդ, նախատեսվում է լայնածավալ հումանիտար օգնության տրամադրում։
Ըստ փաստաթղթի՝ օգնության բաշխումն իրականացնելու են ՄԱԿ-ի գործակալությունները և Պաղեստինի Կարմիր մահիկը։ Փաստաթղթում հստակեցված չէ, թե ինչ ճակատագիր է սպասվում ամերիկյան այն կազմակերպությանը, որը մայիսից սննդային օգնություն է տրամադրում Գազայի մարդասիրական հիմնադրամի շրջանակում։ Իսրայելը ցանկանում է, որ այն փոխարինի ՄԱԿ-ի համակարգող կառույցին։
