Ֆրանսիայի մի շարք օդանավակայաններում գործադուլ է հայտարարված։ Ինչպես հաղորդում է Le Parisien-ը, դրա հետևանքով Փարիզի օդանավակայաններում չեղարկվել է չվերթների մոտ 40 տոկոսը, իսկ երկրի այլ շրջաններում՝ մինչև 50 տոկոսը։
Գործադուլի նախաձեռնողները օդային երթևեկության վերահսկիչների երկու փոքր արհմիություններն են։ Նրանց հիմնական պահանջներն են՝ բարելավել աշխատանքային պայմանները և լուծել անձնակազմի պակասի խնդիրը։ Գործադուլը նախատեսված է այսօր և վաղը։
Ֆրանսիայի Քաղաքացիական ավիացիայի գլխավոր վարչությունը վստահեցրել է, որ «տրանսպորտային խափանումները նվազագույնի հասցնելու նպատակով կիրառում է նվազագույն ծառայությունների մասին կանոնակարգերը օդային նավիգացիայի կենտրոններում և օդանավակայանների նավիգացիոն ծառայություններում, այնտեղ, որտեղ դա թույլատրվում է օրենսդրությամբ»։
