Արգենտինան վերջին օրերին բախվում է բացառիկ ուժեղ ձմեռային սառնամանիքի ալիքի, որը խախտել է տասնամյակների ջերմաստիճանային ռեկորդները և արդեն պատճառ դարձել առնվազն 9 մարդու մահվան․ հաղորդում է Proyecto 7 հումանիտար կազմակերպությունը։
Բուենոս Այրեսում չորեքշաբթի առավոտյան գրանցվել է -1,9°C ջերմաստիճան՝ ամենացածրը վերջին 34 տարում։ Մայրաքաղաքից 25 կմ հեռավորության վրա գտնվող Էլ Պալոմարում գրանցվել է -7,4°C, ինչը ամենացածր ցուցանիշն է այնտեղ 58 տարվա ընթացքում։
Նույնիսկ Ատլանտյան ափի որոշ քաղաքներում, օրինակ՝ Միրամարում, որտեղ ձյուն չէր տեղացել արդեն 12 տարի, այս շաբաթ ձյուն է արձանագրվել։
Առավել ցուրտ վայրն այս օրերին եղել է Մակինչաոն՝ փոքրիկ բնակավայր Պատագոնիայում (3000 բնակիչ), որտեղ ջերմաստիճանը տատանվել է -12°C-ից մինչև -18°C։
Հետազոտողներ և կամավորականներ նշում են, որ անցած 10 օրը ցրտից մահացել է առնվազն 9 մարդ, հիմնականում՝ անօթևաններ։ Այդ տվյալները սակայն դեռ պաշտոնապես չեն հաստատվել իշխանությունների կողմից։
