Համասը Գազայի հատվածում բախվում է գոյատևման լուրջ մարտահրավերների՝ կորցնելով հրամանատարներ, ստորգետնյա թունելների ցանցի մեծ մասը և Իրանի՝ իր դաշնակցի աջակցության վերաբերյալ վստահությունը. գրում է Reuters-ը։
Իսրայելի անողոք ռազմական ճնշման և տեղական ապստամբ խմբավորումների դիմակայության պայմաններում Համասի մարտիկները գործում են ինքնուրույն՝ հրամանով դիմադրել հնարավորինս երկար, սակայն իսլամիստական խմբավորումը դժվարությամբ է պահպանում իր վերահսկողությունը:
Իրավիճակի սրմանը նպաստում է նաև Համասի դեմ պայքարող տեղական ցեղերին Իսրայելի բացահայտ աջակցությունը։
Անմիջական սպառնալիքը չեզոքացնելու համար Համասն իր լավագույն մարտիկներին ուղարկել է Ռաֆահի շրջանում ապստամբ առաջնորդ Յասեր Աբու Շաբաբին վերացնելու համար, սակայն, նա դեռևս մնում է անհասանելի՝ գտնվելով Իսրայելի զորքերի վերահսկողության տակ գտնվող տարածքում:
Չնայած իրավիճակին, խմբավորումը պահպանում է որոշակի ազդեցություն և գործողություն կատարելու կարողություն Գազայի հատվածում, սակայն բախվում է լուրջ մարտահրավերների:
Համասը դեռ ի վիճակի է հարվածներ հասցնել. հունիսի 24-ին, խմբավորումը Գազայի հարավում իրականացված հարձակման հետևանքով սպանել է յոթ իսրայելցի զինվոր: Սակայն, Մերձավոր Արևելքում գործող երեք դիվանագետների խոսքով, հետախուզական գնահատականները ցույց են տալիս, որ Համասը կորցրել է կենտրոնացված հրամանատարությունն ու վերահսկողությունը և սահմանափակվում է սպորադիկ, անակնկալ հարձակումներով:
Իսրայելի ռազմական պաշտոնյայի գնահատմամբ՝ Իսրայելը սպանել է 20,000 կամ ավելի Համասի մարտիկների և ոչնչացրել կամ անօգտագործելի է դարձրել Գազայի ափամերձ գոտու տակ գտնվող հարյուրավոր մղոն երկարությամբ թունելներ: 20 ամսվա հակամարտության ընթացքում Գազայի մեծ մասը վերածվել է ավերակների:
