Մենք չենք բանակցի որևէ կողմի հետ, քանի դեռ շարունակվում են Իսրայելի հարձակումները, Գերմանիայի, Ֆրանսիայի, ՄԹ-ի ու ԵՄ-ի ԱԳ ղեկավարների բանակցություններից հետո հայտարարել է Իրանի արտգործնախարար Աբբաս Արաղչին։
Նա շեշտել է, որ Իրանը կշարունակի իրացնել ինքնապաշտպանության իր օրինական իրավունքը: Արաղչին մտահոգություն է հայտնել Իսրայելի ագրեսիայի ակտը մյուս երկրների կողմից չդատապարտելու կապակցությամբ։
Նա ընդգծել է, որ Իրանի միջուկային ծրագիրը խաղաղ բնույթ ունի և գտնվում է Ատոմային էներգիայի միջազգային գործակալության վերահսկողության ներքո։ Հետևաբար, Իրանի խաղաղ միջուկային օբյեկտների վրա հարձակումը համարվում է ծանր հանցագործություն և միջազգային իրավունքի հրամայական նորմերի լուրջ խախտում։
«Եթե ագրեսիան դադարեցվի, և ագրեսորը պատասխանատվության ենթարկվի իր կատարած հանցագործությունների համար, Իրանը պատրաստ է քննարկել դիվանագիտության հարցը»,- հավելել է Արաղչին։
