Իսրայելի ուժերը ձերբակալել են բարեգործական նավը, որը փորձել էր խախտել Գազայի հատվածի ծովային շրջափակումը: 12 հոգանոց անձնակազմի մեջ է նաև ակտիվիստ Գրետա Թունբերգը, որը կիրակի օրը շարժվում էր դեպի Իսրայելի նավահանգիստ։
«Ազատության նավատորմի կոալիցիան», որը կազմակերպել էր ճանապարհորդությունը, հայտարարել է, որ ակտիվիստները «առևանգվել են Իսրայելի ուժերի կողմից»՝ փորձելով կենսական օգնություն հասցնել տարածք:
«Մադլին» զբոսանավը եղել է բրիտանական դրոշով։ «Ազատության նավատորմի կոալիցիայի» (FFC) փոխանցմամբ, նպատակ ուներ երկուշաբթի օրը Գազային խորհրդանշական օգնություն հասցնել և միջազգային ուշադրություն հրավիրել այնտեղ տիրող մարդասիրական ճգնաժամի վրա:
Իսրայելի արտաքին գործերի նախարարությունը հաստատել է, որ նավը գտնվում է Իսրայելի վերահսկողության տակ:
««Հայտնի մարդկանց» «սելֆի զբոսանավը» ապահով կերպով շարժվում է դեպի Իսրայելի ափեր: Ուղևորները կվերադառնան իրենց երկրներ», - գրել է նախարարությունը X-ում:
Հետագայում նախարարությունը հավելել է, որ բոլոր ուղևորները անվնաս են և ապահով: «Նրանց տրամադրվել են սենդվիչներ և ջուր: Շոուն ավարտված է»:
Զբոսանավը տեղափոխում էր մարդասիրական օգնության փոքր խմբաքանակ, ներառյալ բրինձ և մանկական սնունդ: Արտաքին գործերի նախարարությունը հայտնել է, որ օգնությունը կփոխանցվի Գազա: «Զբոսանավի վրա եղած օգնության փոքր քանակությունը, որը չեն սպառել «հայտնի մարդիկ», կփոխանցվի Գազա՝ իրական մարդասիրական ուղիներով», - գրել է նախարարությունը:
Իսրայելի պաշտպանության նախարար Իսրայել Կացը կիրակի օրը հրամայել է զինվորականներին կանխել «Մադլինի»՝ Գազա հասնելը՝ առաքելությունն անվանելով ՀԱՄԱՍ-ին աջակցող քարոզչական ջանք:
