ԱՄՆ նախագահ Դոնալդ Թրամփը հրամանագիր է ստորագրել, որով արգելվում է 12 երկրի քաղաքացիներին մուտք գործել Միացյալ Նահանգներ: Ըստ Թրամփի, այս միջոցը անհրաժեշտ է «օտարերկրյա ահաբեկիչների» և այլ անվտանգային սպառնալիքների դեմ պաշտպանվելու համար:
Արգելքը վերաբերում է հետևյալ երկրներին՝ Աֆղանստան, Մյանմա, Չադ, Կոնգո, Հասարակածային Գվինեա, Էրիթրեա, Հայիթի, Իրան, Լիբիա, Սոմալի, Սուդան և Եմեն:
Ի լրումն, յոթ այլ երկրներից՝ Բուրունդի, Կուբա, Լաոս, Սիերա Լեոնե, Տոգո, Թուրքմենստան և Վենեսուելա, ճանապարհորդությունները մասամբ կսահմանափակվեն:
«Մենք չենք թույլատրի, որ մեր երկիր մուտք գործեն մարդիկ, ովքեր ցանկանում են վնասել մեզ», - ասել է Թրամփը X-ում տեղադրված տեսանյութում:
Նա նշել է, որ ցուցակը կարող է վերանայվել, և նոր երկրներ կարող են ավելացվել:
Հռչակագիրն ուժի մեջ կմտնի 2025 թվականի հունիսի 9-ին՝ ժամը 00:01-ին: Մինչ այդ տրված վիզաները ինչպես նշված է հրամանում, չեն չեղարկվի։
Իր առաջին պաշտոնավարման ընթացքում Թրամփը հայտարարել էր մահմեդական մեծամասնություն ունեցող յոթ երկրների ճանապարհորդների մուտքի արգելք, որը մի քանի փոփոխություններից հետո 2018 թվականին հաստատվել էր Գերագույն դատարանի կողմից:
