ԱՄՆ Կոլորադո նահանգի Բոուլդեր քաղաքում Մոհամեդ Սաբրի Սոլիման անունով անձը, բղավելով «Ազատություն Պաղեստինին», դյուրավառ հեղուկով լցված շշեր է նետել Գազայում գերեվարված իսրայելցի պատանդներին աջակցող երթի մասնակիցների վրա: Վեց մարդ ստացել է այրվածքներ:
Կասկածյալը՝ 45-ամյա Մոհամեդ Սաբրի Սոլիմանը, ձերբակալվել է։ ՀԴԲ-ն, որը հրապարակել է կասկածյալի անունը, հայտարարել է, որ միջադեպը դիտարկվում է որպես ահաբեկչական գործողություն։
Բոուլդերի ոստիկանապետ Սթիվեն Ռեդֆերնը լրագրողներին հայտնել է, որ տուժածներից ոմանք ստացել են ծանր այրվածքներ և տեղափոխվել են հիվանդանոց։ Տուժածների տարիքը 67-ից 88 տարեկան է։
Իսրայելի արտաքին գործերի նախարար Գիդեոն Սաարը միջադեպը որակել է որպես «մաքուր հակասեմիտիզմի դրսևորում»։
«Ցնցված եմ Բոուլդերում հրեաների դեմ իրականացված սարսափելի հակասեմական ահաբեկչությունից։ Սա մաքուր հակասեմիտիզմ է, որը սնվում է լրատվամիջոցների տարածած արյունոտ զրպարտություններով»,- գրել է նախարար Սաարը X սոցիալական ցանցում։
