Այսօր առավոտյան 133 կարդինալները Վատիկանում մասնակցում են պատարագի, իսկ կեսօրին մեկուսանալու են՝ սկսելու կոնկլավը՝ Հռոմի պապի ընտրությունը։
Իր քարոզի ժամանակ կարդինալ Ջովանի Բատիստա Ռեն խնդրել է Սուրբ հոգու օգնությունը՝ առաջնորդելու կարդինալներին՝ ընտրել այն Պապին, «որն անհրաժեշտ է եկեղեցուն և մարդկությանը պատմության այս դժվար և բարդ շրջադարձային պահին»:
Նա կոչ է արել կարդինալներին մի կողմ դնել «բոլոր անձնական նկատառումները» և ցուցաբերել սեր՝ «միակ ուժը, որն ի վիճակի է փոխել աշխարհը»:
Ռեն աղոթել է, որ ընտրվի այնպիսի Պապ, որը կծառայի «եկեղեցու և մարդկության բարօրությանը»:
Կարդինալի քարոզը համարվում է ուղեցույց կոնկլավին մասնակցող 133 կարդինալների համար։
Ջովանի Բատիստա Ռեն նույն իտալացի կարդինալն է, որը վարել է Պապ Ֆրանցիսկոսի հուղարկավորության պատարագը։
Ըստ միջազգային լրատվամիջոցների՝ Պապի պաշտոնական թեկնածուներ չկան, սակայն որոշ կարդինալներ համարվում են «պապաբիլե»՝ ունեն Պապ դառնալու համար անհրաժեշտ հատկանիշները: Հավանական թեկնածուներից են Պետրո Պարոլինը, որը կղեկավարի կոնկլավը, Լուիս Թագլեն, որը հայտնի է որպես «ասիական Ֆրանցիսկոս», Ֆրիդոլին Ամբոնգո Բեսունգուն՝ Կոնգոյից պահպանողական կարդինալ, և Պիերբատիստա Պիցաբալլան, որը կարող է դառնալ տասնամյակների ընթացքում առաջին իտալացի Պապը:
