Քվեարկության երկրորդ փուլում Բունդեսթագը Գերմանիայի կանցլեր է ընտրել Քրիստոնեա-դեմոկրատական միության և Քրիստոնեա-սոցիալական միության դաշինքի առաջնորդ Ֆրիդրիխ Մերցին։ Քաղաքական գործիչն ստացել է 325 ձայն, մեծամասնություն կազմելու համար անհրաժեշտ էր 316 ձայն։ Դեմ է քվեարկել 289 պատգամավոր, մեկը՝ ձեռնպահ։ Եվս երեք քվեաթերթիկ անվավեր է ճանաչվել։
Այսօր ավելի վաղ Մերցը բավարար ձայներ չէր հավաքել Բունդեսթագի ընտրությունների առաջին փուլում կանցլեր ընտրվելու համար։ Մերցի թեկնածության օգտին քվեարկել էր խորհրդարանի 310 անդամ։ Մերցը դարձել է երկրի պատմության տասներորդ կանցլերը Երկրորդ համաշխարհային պատերազմից հետո ընկած ժամանակահատվածում։
Գերմանիայի նախագահ Ֆրանկ-Վալտեր Շտայնմայերը հաստատել է Ֆրիդրիխ Մերցի թեկնածությունը կանցլերի պաշտոնում։
