Իրանն Ադրբեջանին և Վրաստանին առաջարկում է ՏՐԱՍԵԿԱ-ի (Transport Corridor Europe-Caucasus-Asia) շրջանակներում տարանցիկ միջանցք ստեղծել, հայտարարել է Իրանի ճանապարհների և քաղաքային զարգացման նախարարի խորհրդական Ամին Տարաֆոն։
Նրա խոսքով՝ այս նախաձեռնությունը հնչել է Իրանի ճանապարհների և քաղաքաշինության նախարարի` վերջերս Ադրբեջան կատարած այցի ժամանակ և արժանացել է պաշտոնյաների հավանությանը։
ՏՐԱՍԵԿԱ-ն Եվրոպական Միության և գործընկեր երկրների միջև միջազգային համագործակցության ծրագիր է, որը նպատակ ունի զարգացնել տնտեսական հարաբերությունները, առևտուրը և տրանսպորտային հաղորդակցությունները Սև ծովի ավազանի, Հարավային Կովկասի և Կենտրոնական Ասիայի տարածաշրջաններում՝ բոլոր մասնակից երկրների քաղաքական կամքի և ընդհանուր ձգտումների վրա հիմնված ակտիվ գործողությունների շնորհիվ։
Այսօր ՏՐԱՍԵԿԱ միջազգային տրանսպորտային միջանցքը ներառում է Եվրոպա-Կովկաս-Ասիա միջանցքի զարգացման միջազգային տրանսպորտի մասին բազմակողմ հիմնական համաձայնագրին (BMA TRACECA) մասնակցող 14 երկրների տրանսպորտային համակարգը՝ Ադրբեջան, Հայաստան, Բուլղարիա, Վրաստան, Իրան, Ղազախստան, Ղրղզստան, Մոլդովա, Ռումինիա, Տաջիկստան, Թուրքմենստան, Թուրքիա, Ուկրաինա, Ուզբեկստան։
