Միջազգային

Ադրբեջանը Ռուսաստանին մեղադրում է կիբերհարձակման մեջ

Փետրվարի 20-ին ադրբեջանական մեդիա հարթակների վրա կատարված կիբերհարձակումը կազմակերպվել է Ռուսաստանի տարածքից․ Minval-ի փոխանցմամբ՝ հայտարարել է խորհրդարանի համապատասխան հանձնաժողովի ղեկավար Ռամիդ Նամազովը։

Ըստ նրա՝ հարձակման հետևում կանգնած է APT 29 հաքերային խումբը (հայտնի նաև որպես Cozy Bear), որը կապված է ռուսական պետական կառույցների հետ։ Նամազովի խոսքով՝ այս գործողությունները խախտում են Բաքվի և Մոսկվայի միջև դաշնակցային հռչակագրով ամրագրված պարտավորությունները։

Նա նշել է, որ հարձակման հնարավոր դրդապատճառներից կարող է լինել Բաքվում «Ռուսական տան» փակումը և Sputnik-ի ադրբեջանական ներկայացուցչության լուծարման հարցի քննարկումը։

Խորհրդարանի արտաքին միջամտությանը հակազդելու ժամանակավոր հանձնաժողովի նիստում պատգամավոր Ռասիմ Մուսաբեկովը կոչ է արել միջադեպը քննարկել ռուսական կողմի հետ։ Նա ընդգծել է, որ նման գործողությունների կրկնությունը կարող է ստանալ բացահայտ քաղաքական ենթատեքստ։

«Կիբերհարձակումները պետք է դիտարկել որպես լուրջ սպառնալիք ազգային անվտանգության համար, և համապատասխան մարմինները պարտավոր են համապատասխան արձագանք տալ»,- նշել է Մուսաբեկովը։