ԱՄՆ նախագահ Դոնալդ Թրամփը հայտարարել է, որ առաջիկա օրերին Ուկրաինայի հարցով շատ կարևոր հանդիպումներ են լինելու։ Նրա խոսքով՝ բանակցություններից ԱՄՆ-ի դուրս գալու հարցը կարող է օրակարգում հայտնվել 2 շաբաթից։ Առաջիկա օրերը այս առումով խիստ կարևոր են։ ՌԴ-ի զիջումը պատերազմի դադարեցումն է և ողջ Ուկրաինան գրավելուց հրաժարվելը, ասել է նա։
«Մենք ցանկանում ենք արագ ավարտել այս պատերազմը: Կարծում եմ՝ առաջընթաց ենք գրանցել, կտեսնենք, թե ինչ կլինի: Առաջիկա մի քանի օրերին շատ կարևոր հանդիպումներ են լինելու»,- ասել է Թրամփը՝ Սպիտակ տանը Նորվեգիայի վարչապետի հետ հանդիպման ժամանակ:
Թրամփը վստահություն է հայտնել, որ Միացյալ Նահանգները դուրս չի գա Ուկրաինայի բանակցություններից, քանի որ համաձայնություն ձեռք կբերվի։
«Կարծում եմ՝ գործարք կկնքենք: Դա հիանալի կլինի, կարող եք այս մասին հարցնել երկու շաբաթից»,- ասել է նա՝ պատասխանել է բանակցություններից ԱՄՆ-ի դուրս գալու հեռանկարների մասին հարցին։
ԱՄՆ նախագահը հայտարարել է, որ չի հավատում, թե Ռուսաստանն արգելափակում է Ուկրաինայում հրադադարի համաձայնագիրը։
«Ես այդպես չեմ կարծում: Ես կարծում եմ, որ նրանք երկուսն էլ (Ռուսաստանը և Ուկրաինան - խմբ.) ցանկանում են խաղաղություն և նրանք երկուսն էլ ցանկանում են գործարք կնքել»,- ասել է Թրամփը և հավելել, որ ԱՄՆ-ն Ռուսաստանի վրա մեծ ճնշում է գործադրում։
