Առնվազն երկու մարդ զոհվել է, վեցը՝ վիրավորվել Ֆլորիդայի Պետական համալսարանի տարածքում տեղի ունեցած հրաձգության հետևանքով։
Հրաձգությունը կազմակերպել է 20-ամյա Ֆինիքս Այքները՝ շերիֆի տեղակալի որդին, ով համալսարանի ուսանող է։
«Ցավոք, նա հասանելիություն է ունեցել մոր զենքին, որը հայտնաբերվել է դեպքի վայրում»,- հայտարարել է շերիֆ ՄակՆիլը։
Նրա խոսքով՝ կասկածյալը երկար ժամանակ անդամակցել է Լիոն շրջանի շերիֆի գրասենյակի երիտասարդական խորհրդատվական խորհրդին։ «Մեզ համար անակնկալ չէր, որ նա զենքի հասանելիություն է ունեցել»,- հավելել է շերիֆը։
Իշխանությունների փոխանցմամբ՝ զոհերը համալսարանի ուսանողներ չեն եղել։ Նրանց մասին այլ մանրամասներ չեն հաղորդվում։
Հարձակվողը վիրավորվել է ոստիկանության հետ փոխհրաձգության ժամանակ և այժմ գտնվում է հիվանդանոցում։ Նրա առողջական վիճակի վերաբերյալ տվյալներ չկան։
ԱՄՆ նախագահ Դոնալդ Թրամփը, Սպիտակ տանը Իտալիայի վարչապետ Ջորջա Մելոնիի հետ հանդիպման ժամանակ, նշել է, որ տեղյակ է միջադեպի մասին։
Լրագրողների՝ զենքի օրենսդրության փոփոխման վերաբերյալ հարցերին ի պատասխան՝ Թրամփը հայտարարել է. «Ես Երկրորդ փոփոխության մեծ կողմնակից եմ և միշտ էլ եղել եմ։ Զենքը չէ, որ կրակում է, այլ մարդիկ»։ Նա միջադեպը «ամոթալի» է որակել։
CNN-ի հաղորդմամբ՝ ըստ Gun Violence Archive կազմակերպության տվյալների, սա Ֆլորիդայում ընթացիկ տարում զենքի կիրառմամբ արդեն վեցերորդ զանգվածային հարձակումն է։
