Դոմինիկյան Հանրապետությունում գիշերային ակումբի տանիքի փլուզման պատճառով զոհերի թիվը հասել է 98-ի։ Եվս 150-ից ավելի մարդ վիրավոր է։
Զոհվածների թվում է հայտնի բեյսբոլիստ Օկտավիո Դոտելը։ Փրկարարները նրան դուրս են բերել փլատակների տակից, սակայն Դոտելը մահացել է հիվանդանոց տեղափոխվելու ճանապարհին։
Երկրի նախագահ Լուիս Աբինադերը ժամանել է դեպքի վայր և իր ցավակցությունները հայտնել զոհվածների ընտանիքներին։
Սանտո Դոմինգոյում գտնվող Jet Set գիշերային ակումբի տանիքը հանկարծակի փլվել էր երեքշաբթի գիշերը՝ ապրիլի 8-ին, երբ հայտնի մերենգե կատարող Ռուբի Պերեսը ելույթ էր ունենում։
Երաժշտի դստեր խոսքով՝ հայրը նույնպես հայտնվել է փլատակների տակ, փրկարարները դեռ չեն գտել նրան։
Տեղական լրատվամիջոցները հայտնում են, որ փլուզման պահին ակումբում կարող էր գտնվել մոտ 1000 մարդ։
Փրկարար ծառայության ղեկավարի խոսքով՝ զոհերի թիվը կարող է աճել, քանի որ փլատակների տակ դեռ շատ տուժածներ կան։
Փրկարարական աշխատանքներին մասնակցում է շուրջ 400 մասնագետ։
