ՆԱՏՕ-ն չի մասնակցի Ուկրաինայի և Ռուսաստանի միջև պատերազմի դադարեցման հարցով բանակցություններին, ուստի դաշինքն այս հարցում չունի իր «կարմիր գծերը»։ Այս մասին ասել է ՆԱՏՕ-ի գլխավոր քարտուղար Մարկ Ռյուտեն։
«Մենք՝ որպես ՆԱՏՕ, չենք մասնակցում այդ բանակցություններին: Դրանք իսկապես վարում են ԱՄՆ-ը Ուկրաինայի և ռուսների հետ միասին: Ես ուրախ եմ, որ ԱՄՆ-ն առաջ է շարժվել այս հարցում, և այդ բանակցությունները այժմ շարունակվում են»,- ասել է նա:
Ռյուտեն նշել է, որ ՆԱՏՕ-ն որպես առանձին կազմակերպություն բանակցություններում «կարմիր գծեր» չունի, քանի որ ներգրավված չէ այդ գործընթացում։
«Կարծում եմ՝ ՆԱՏՕ-ն չունի իր կարմիր գծերը, քանի որ մենք այս գործընթացի մաս չենք: Բայց, իհարկե, ընդհանուր առմամբ, մենք ցանկանում ենք, որ Ուկրաինան լինի ինքնիշխան պետություն: Դա այն է, ինչ մենք բոլորս ուզում ենք: Դա պետք է լինի արդար և տեւական խաղաղություն»,- ասել է նա։
