ԱՄՆ-ում սուսերամարտիկ կինը որակազրկվել է՝ հրաժարվելով մենամարտել տրանսգենդեր մարզիկի հետ: Միջադեպը տեղի է ունեցել Մերիլենդի համալսարանում անցկացված Cherry Blossom սուսերամարտի մրցաշարում: Սոֆի Թերները, բողոքելով Ռեդմոնդ Սալիվանի՝ տրանսգենդեր մարզիկի մասնակցության դեմ, ծնկի է իջել նրա առաջ՝ ի նշան բողոքի: Այս արարքի համար նա ստացել է սև քարտ և հեռացվել մրցաշարից:
Դեպքը լայն տարածում է գտել ԱՄՆ-ում՝ առաջացնելով բուռն քննարկումներ: Սալիվանը 2024 թվականին Նյու Յորքի Վագներ քոլեջում տղամարդկանց թիմից տեղափոխվել է կանանց թիմ:
«Ես ասացի մրցավարին, որ չեմ կարող մրցել, քանի որ ես կին եմ, իսկ նա՝ տղամարդ, և սա կանանց մրցաշար է»,- ասել է Թերները Fox News-ին:
Թերներին աջակցել է թենիսի լեգենդ Մարտինա Նավրատիլովան, որը քննադատում է տրանսգենդեր մարզիկների մասնակցությունը՝ համարելով, որ նրանք ֆիզիկական առավելություն ունեն:
«Այսպես է լինում, երբ կին մարզիկները բողոքում են: Ինչպե՞ս կարելի է սա արդար համարել: Ինչպե՞ս եք համարձակվում կանանց մեղադրել սեռային «անհեթեթությունների» համար»,- գրել է նա X-ում:
