Նախագահ Դոնալդ Թրամփի որոշումը՝ ԱՄՆ ներմուծվող ապրանքների մեծ մասի վրա մաքսատուրք սահմանելու մասին, սրել է համաշխարհային առևտրային պատերազմը՝ սպառնալով բարձրացնել գնաճը և դանդաղեցնել տնտեսական աճը։
Չինաստանը, որը աշխարհի երկրորդ խոշորագույն տնտեսությունն է և արդեն բախվում էր Թրամփի նախկինում սահմանած 20% մաքսատուրքերին, այժմ ենթարկվելու է ևս 34% լրացուցիչ տուրքի։ Պեկինը կոչ է արել ԱՄՆ-ին անհապաղ չեղարկել նոր սահմանափակումները՝ նախազգուշացնելով, որ կձեռնարկի պատասխան քայլեր։
ԱՄՆ-ի գանձապետարանի ղեկավար Սքոթ Բեսենթը կոչ է արել մյուս երկրներին զերծ մնալ պատասխան գործողություններից, որոնք կարող են հանգեցնել սպառողական ապրանքների, այդ թվում՝ հեծանիվների և գինու, գների կտրուկ աճի։ «Եթե դուք պատասխանեք, ապա դա կհանգեցնի էսկալացիայի»,– նշել է Բեսենթը CNN-ին տված հարցազրույցում։
Թրամփի մաքսային քաղաքականությունը դժգոհություն է առաջացրել նաև ԱՄՆ-ի դաշնակիցների շրջանում։ Եվրոպական Միությունը բախվում է 20% մաքսատուրքի, իսկ Ճապոնիայի համար սահմանվել է 24% դրույքաչափ։ Տոկիոն հայտարարեց, որ դիտարկում է բոլոր հնարավոր միջոցները՝ այս «ծայրահեղ ցավալի» մաքսատուրքերին արձագանքելու համար։
Հիմնական 10% մաքսատուրքերը ուժի մեջ կմտնեն ապրիլի 5-ից, իսկ ավելի բարձր փոխադարձ դրույքաչափերը՝ ապրիլի 9-ից։
Fitch Ratings գործակալության տվյալներով՝ Թրամփի նախագահության օրոք ԱՄՆ ներմուծման հարկի արդյունավետ դրույքաչափը 2024-ի 2.5%-ից աճել է մինչև 22%։
Թրամփը հայտարարել է, որ «փոխադարձ» մաքսատուրքերը պատասխան են ԱՄՆ-ի ապրանքների նկատմամբ կիրառվող տուրքերին և ոչ սակագնային խոչընդոտներին։ Նա պնդել է, որ նոր մաքսատուրքերը կնպաստեն երկրում արտադրական աշխատատեղերի ստեղծմանը։
