ԱՄՆ նախագահ Դոնալդ Թրամփը մաքսատուրքեր է սահմանել աշխարհի շատ երկրների համար՝ նվազագույն 10 տոկոս դրույքաչափով, այդ թվում՝ Ուկրաինայի և Իսրայելի համար:
Հատկանշական է, որ մաքսատուրքերի ցուցակից դուրս են մնացել Ռուսաստանը, ԿԺԴՀ-ն, Կուբան և Բելառուսը: Սրա պատճառն այն է, որ ԱՄՆ-ն արդեն սահմանված պատժամիջոցներ ունի այս պետությունների հետ և «առևտրի մասշտաբները նշանակալի չեն»։ Այս մասին Axios-ին տված մեկնաբանության մեջ հայտնել Է Սպիտակ տան մամուլի քարտուղար Քերոլայն Լևիտը։
Պարբերականը միաժամանակ նշում է, որ ԱՄՆ-ն ավելի շատ առևտուր է անում Ռուսաստանի հետ, քան մաքսատուրքերի ցուցակում հայտնված որոշ փոքր երկրների, այդ թվում՝ Մավրիկիոսի կամ Բրունեյի:
Լևիտի խոսքով՝ Ռուսաստանը դեռ կարող է բախվել «լրացուցիչ խիստ պատժամիջոցների»:
Թրամփի ցուցակից հանվել են նաև Կանադան և Մեքսիկան: Մամուլի քարտուղարը հաստատել է, որ դա տեղի է ունեցել այն պատճառով, որ Թրամփն արդեն 25% մաքսատուրքեր է սահմանել երկու երկրների համար:
Նշենք, որ ԱՄՆ-ի և Ռուսաստանի միջև առևտրի ծավալը կտրուկ նվազել է՝ 2021 թվականի մոտ 35 միլիարդ դոլարից հասնելով մինչև 3,5 միլիարդ դոլար:
