ԱՄՆ նախագահ Դոնալդ Թրամփի սահմանած մաքսատուրքերը «տնտեսական մեծ սխալ» են։ Այս մասին հայտարարել է Եվրոպական խորհրդի նախագահ Անտոնիո Կոշտան, փոխանցում է Euronews-ը։
«Սա իսկապես մեծ տնտեսական սխալ է Միացյալ Նահանգների, ինչպես նաև Եվրոպայի և ամբողջ աշխարհի համար։ Մենք պետք է պատասխանենք վճռական, բայց միևնույն ժամանակ՝ խելամիտ: Դա նշանակում է, որ մենք պետք է համաձայնության հասնենք բանակցություններում»,- ասել է նա։
Նա նշել է, որ Եվրամիության և Միացյալ Նահանգների միջև առևտրային պատերազմը «կազդի բոլորի վրա»:
Նրա խոսքով՝ սակագնային պատերազմի մեջ մտնելը լավագույն ճանապարհը չէ։
«Մենք իսկապես պետք է արձագանքենք այնպես, որ բանակցությունների միջոցով լուծում գտնենք՝ ի շահ Միացյալ Նահանգների և Եվրոպայի, ամերիկյան տնտեսության և եվրոպական տնտեսության ընդհանուր և փոխադարձ շահերի», – հավաստիացրել է նա:
«Մեր առևտրային հարաբերությունները կազմում են համաշխարհային առևտրի 30%- ը (և) համաշխարհային ՀՆԱ-ի 40% - ը, ուստի դա ոչ միայն կազդի Եվրոպայի և ԱՄՆ-ի վրա, այլև բոլորի վրա, ուստի դա մեծ սխալ է»,-հավելել է նա:
