Դոնալդ Թրամփը տեղեկացրել է իր շրջապատին, այդ թվում՝ վարչակազմին, որ DOGE-ի ղեկավար Իլոն Մասկը մոտակա շաբաթների ընթացքում կլքի պաշտոնը, գրում է Politico-ն։
«Թրամփը գոհ է Մասկից և DOGE-ից, բայց որոշել են, որ նա պետք է վերադառնա բիզնես գործունեությանը»,- տեղեկացնում է կայքը:
Նշվում է, որ Թրամփի վարչակազմի որոշ պաշտոնյաներ և որոշ արտաքին դաշնակիցներ հիասթափվել են Մասկի անկանխատեսելիությունից։ Ըստ աղբյուրներից մեկի՝ Մասկը, հավանաբար, կպահպանի ոչ պաշտոնական խորհրդատվական դերը:
Սպիտակ տունը, սակայն, շտապել է հերքել Politico-ին։ Սպիտակ տան մամուլի քարտուղար Քերոլայն Լևիթը X-ի իր էջում գրել է, որ Մասկը կլքի պետական ծառայությունը, երբ ավարտվի իր աշխատանքը Կառավարության արդյունավետության դեպարտամենտում (DOGE) և որ այս մասին Մասկն ու նախագահը հրապարակայնորեն հայտարարել են։
