Իրանի ԱԳ նախարար Աբբաս Արաղչին հայտարարել է, որ դիվանագիտական փոխգործակցությունը ցույց է տվել իր արդյունավետությունը անցյալում, և ներկայում ևս կարող է արդյունավետ լինել, սակայն բոլորի համար պետք է պարզ լինի, որ չկա «ռազմական տարբերակ» հասկացություն, առավել ևս՝ «ռազմական լուծում»:
ISNA-ի տվյալներով՝ Իրանի արտաքին գործերի նախարարը սրանով արձագանքել է ԱՄՆ նախագահ Դոնալդ Թրամփի հակաիրանական հայտարարություններին: «ԱՄՆ նախագահը կարող է շահագրգռված չլինել 2015-ի միջուկային գործարքով, սակայն այդ գործարքը պարունակում է առանցքային պարտավորություն Իրանի կողմից, որը մնում է ուժի մեջ, և նույնիսկ ԱՄՆ-ը, որը չի մասնակցում գործարքին, օգուտ է քաղել դրանից: Իրանը կրկին հայտարարում է, որ երբեք և ոչ մի պարագայում չի ձգտի միջուկային զենք փնտրել, արտադրել կամ ձեռք բերել»,- գրել է Արաղչին իր «X»-ի էջում:
Իրանի ԱԳ նախարարը հայտարարել է, որ ՀԳՀԾ-ի ստորագրումից 10 տարի և ԱՄՆ-ի միակողմանի դուրս գալուց 7 տարի անց ոչ մի ապացույց չկա, որ Իրանը խախտել է այդ պարտավորությունը՝ հիշեցնելով, որ նույնիսկ ԱՄՆ ազգային հետախուզության տնօրեն Թուլսի Գաբարդը վերջերս լիովին խոստովանել է դա: Արաղչին ընդգծել է. «Բոլորի համար պետք է պարզ լինի, որ չկա ռազմական տարբերակ հասկացություն, առավել ևս՝ ռազմական լուծում»:
