ԱՄՆ նախագահ Դոնալդ Թրամփը հայտարարել է, որ ԱՄՆ վարչակազմը կքննարկի Ռուսաստանի առաջ քաշած պահանջները՝ Սև ծովում հրադադար հաստատելու համար:
«Մոտավորապես հինգ կամ վեց պայման կա։ Մենք դիտարկում ենք դրանք բոլորը»,- ասել է նա լրագրողներին Սպիտակ տանը: Սաուդյան Արաբիայում կայացած բանակցությունների արդյունքում ԱՄՆ-ը Ռուսաստանի և Ուկրաինայի հետ պայմանավորվել է Սև ծովում հարվածները դադարեցնելու և անվտանգ նավագնացության ապահովման շուրջ:
Սակայն Մոսկվան կարճ ժամանակ անց հայտարարել է, որ նավագնացության անվտանգության մասին դրույթը ուժի մեջ կմտնի միայն այն բանից հետո, երբ կհանվի Ռուսաստանի դեմ պատժամիջոցների մի մասը: Մոսկվայի պահանջների թվում են «Ռոսսելխոզբանկի» և պարարտանյութ արտադրող ու արտահանող ընկերությունների նկատմամբ պատժամիջոցների վերացումը, ինչպես նաև Ռուսաստանի դրոշի ներքո նավերի նավահանգիստներում սպասարկման սահմանափակումների վերացումը, որոնք առնչվում են պարենի և պարարտանյութերի առևտրին:
