Միջազգային
Կառավարությունը հաստատել է անվտանգության գործակալության տնօրենի պաշտոնանկությունը
Իսրայելի վարչապետի գրասենյակը հաստատել է՝ ներքին հետախուզության գործակալության՝ Շին Բեթի ղեկավար Ռոնեն Բարը պաշտոնանկ է արվել։ Որոշումը կայացվել է այն բանից հետո, երբ վարչապետ Բենյամին Նեթանյահուն հայտարարել էր, որ այլևս վստահություն չունի Բարի նկատմամբ։ Չնայած եռօրյա բողոքի ցույցերին՝ կառավարությունը միաձայն հաստատել է այս որոշումը։
«Կառավարությունը միաձայն ընդունել է վարչապետ Բենյամին Նեթանյահուի առաջարկը՝ դադարեցնելու Իսրայելի անվտանգության գործակալության (Շին Բեթ) տնօրեն Ռոնեն Բարի պաշտոնավարումը»,- ասված է հայտարարության մեջ։
Բարը կհեռանա պաշտոնից, երբ նշանակվի իր հետևորդը, կամ առավելագույնը՝ մինչև ապրիլի 10-ը, նշված է հայտարարության մեջ։
Ռոնեն Բարը, ում պաշտոնավարման ժամկետը պետք է ավարտվեր հաջորդ տարի, նշանակվել էր նախորդ կառավարության կողմից, որը 2021 թվականի հունիսից մինչև 2022 թվականի դեկտեմբեր ժամանակավորապես հեռացրել էր Նեթանյահուին իշխանությունից։ Նրա հարաբերությունները Նեթանյահուի հետ լարված էին դեռևս 2023 թվականի հոկտեմբերի 7-ին ՀԱՄԱՍ-ի աննախադեպ հարձակումից առաջ, որը հանգեցրեց Գազայի պատերազմին։ Լարվածության պատճառներից էին, մասնավորապես, դատական բարեփոխումների առաջարկները, որոնք երկիրը բաժանել էին երկու ճամբարի։
