Նախագահ Դոնալդ Թրամփը զգուշություն է հայտնել Չինաստանի և Ռուսաստանի միջև ավելի սերտ կապերի կապակցությամբ՝ ուրվագծելով ԱՄՆ-ի կողմից երկու երկրների հետ հարաբերությունները բարելավելու ծրագրերը։
«Որպես պատմության ուսանող՝ առաջին բանը, որ սովորում ես, այն է, որ ցանկալի չէ, որ Ռուսաստանն ու Չինաստանը միավորվեն։ Օբաման նրանց ստիպեց «ամուսնանալ», ինչը երբեք չէր կարող տեղի ունենալ, քանի որ նրանք մշտապես թշնամական վիճակում էին։
Հիմա նրանք, հավանաբար, բարեկամ են, և մենք կփորձենք երկուսի հետ էլ բարեկամ լինել»,- ասել է ԱՄՆ նախագահը Fox News-ին տված հարցազրույցում։
Նախագահը կասկածի տակ է դրել Մոսկվայի և Պեկինի երկկողմ հարաբերությունների հիմքերը՝ նշելով, որ դրանք «բնական չեն»։
«Հնարավոր է, որ այժմ նրանք բարեկամական են տրամադրված, բայց մենք ևս պատրաստվում ենք բարեկամական հարաբերություններ պահպանել երկուսի հետ», - հավելել է նա։
Թրամփի խոսքով՝ Չինաստանը մեծապես ԱՄՆ-ի կարիքն ունի առևտրի ոլորտում, սակայն անհրաժեշտ է կրճատել դեֆիցիտը։ Իսկ Ռուսաստանը, նրա կարծիքով, կցանկանար դառնալ ԱՄՆ-ի տնտեսական հզորության մի մասը։
