ԱՄՆ նախագահ Դոնալդ Թրամփը հայտարարել է, որ քանի դեռ Ռուսաստանը չի համոզվել հրադադար հաստատելու հարցում, Ուկրաինայում հակամարտությունը կշարունակվի։
«Եթե կարողանանք համոզել Ռուսաստանին հրադադար հաստատել, հիանալի կլինի: Եթե ոչ, ապա պատերազմը կշարունակվի, մարդիկ կզոհվեն վաղը և հաջորդ օրերին»,- նշել է նա։
ԱՄՆ նախագահն ակնկալում է, որ ՌԴ նախագահ Վլադիմիր Պուտինը կհամաձայնի դադարեցնել ռազմական գործողություններն Ուկրաինայում՝ նշելով, որ ԱՄՆ պաշտոնյաներն առաջիկա օրերին կհանդիպեն ռուսական կողմի հետ։
«Ուկրաինան համաձայնել է հրադադարի, այժմ մենք պետք է ստիպենք նախագահ Պուտինին համաձայնել դրան, որպեսզի կարողանանք այս գործընթացը տեղից շարժել։ Կարծում եմ՝ այս շաբաթ կխոսեմ Պուտինի հետ»,- Սպիտակ տան մոտ լրագրողների հետ զրույցում ասել է Թրամփը:
Նա նշել է, որ ամերիկացի պատվիրակներն այսօր կամ վաղը բանակցություններ են ծրագրում ռուսական կողմի հետ՝ քննարկելու հնարավոր հրադադարի պայմանները։ ԱՄՆ նախագահը նաև ասել է, որ պատրաստ է Ուկրաինայի նախագահ Վոլոդիմիր Զելենսկիին կրկին հրավիրել Սպիտակ տուն։
