Բրյուսելում տեղի ունեցած գագաթնաժողովում Եվրոպական միության առաջնորդները որոշում են կայացրել կտրուկ ավելացնել պաշտպանական ծախսերը՝ Ուկրաինային աջակցելու և մայրցամաքի անվտանգությունն ամրապնդելու նպատակով:

Եվրոպական հանձնաժողովի նախագահ Ուրսուլա ֆոն դեր Լյայենը ներկայացրել է «ReArm Europe» ծրագիրը, որը նախատեսում է 800 միլիարդ եվրոյի ներդրում՝ Եվրամիության պաշտպանունակությունը բարձրացնելու համար: ԵՄ ղեկավարները համաձայնել են մեղմացնել բյուջետային սահմանափակումները՝ թույլ տալով, որ պաշտպանական ծախսերը դուրս մնան բյուջեի դեֆիցիտի և պարտքի սահմանափակումներից: Սա կարող է «ազատել» շուրջ 600-650 միլիարդ եվրո և ուղղել ռազմական կարողությունների զարգացմանը: 

Ըստ ֆոն դեր Լայենի՝ «Սա Եվրոպայի և Ուկրաինայի համար ջրբաժանի պահ է»:

Գագաթնաժողովում քննարկվել է նաև Եվրահանձնաժողովի առաջարկը՝ անդամ երկրներին 150 միլիարդ եվրոյի պաշտպանական վարկեր տրամադրելու վերաբերյալ:

ԵՄ 27 երկրներից միայն Հունգարիայի վարչապետ Վիկտոր Օրբանը չի աջակցել Ուկրաինայի պաշտպանության վերաբերյալ հայտարարությանը: Նրա մերժումը պայմանավորված է Ռուսաստանի հետ նրա մերձավոր կապերով և Թրամփի քաղաքական գծին համահունչ դիրքորոշմամբ: Սակայն ԵՄ մյուս 26 երկրները, այդ թվում՝ Սլովակիան, հստակ աջակցություն են հայտնել Ուկրաինային՝ ընդգծելով, որ ցանկացած խաղաղ բանակցություն պետք է անցկացվի Կիևի անմիջական մասնակցությամբ․ «Ուկրաինայի մասին բանակցություններ չեն կարող լինել առանց Ուկրաինայի»,- ասված է հայտարարությունում։

Ուկրաինայի նախագահ Վոլոդիմիր Զելենսկին, որը ժամանել էր Բրյուսել, ընդգծել է, որ եվրոպական առաջնորդների որոշումները ցույց են տալիս Ուկրաինային մենակ չթողնելու պատրաստակամությունը: «Մենք շատ շնորհակալ ենք, որ մենակ չենք: Եվ սա պարզապես խոսքեր չեն», - ասել է Զելենսկին։ Նա շեշտել է, որ խաղաղության վերաբերյալ ցանկացած բանակցություն պետք է ներառի բոլոր այն երկրները, որոնք աջակցում են Ուկրաինային, և այս հարցում Եվրոպան առանցքային դեր ունի: 

Եվրոպական խորհրդի նախագահ Անտոնիու Կոստան նշել է, որ ԵՄ-ն կանգնած է նոր անվտանգային իրականության առաջ, որը պահանջում է արագ ու համարձակ գործողություններ: ՆԱՏՕ-ի և ԱՄՆ-ի աջակցության վրա լիովին հույս դնելու փոխարեն Եվրոպան պետք է ինքնուրույն ամրապնդի իր պաշտպանունակությունը: 

Ա․Գ․