Գերմանիայի կրթության և հետազոտությունների նախարարությունը դադարեցրել է գերմանա-վրացական գիտական համագործակցությունը։ Այս մասին հայտնել է Վրաստանում Գերմանիայի դեսպան Պետեր Ֆիշերը։
«Նախարարությունը սառեցրել է գիտական համագործակցության արդիականացումը, ներառյալ ուսանողների շարժունակությունը, հետազոտական և եվրոպական ծրագրերը՝ Վրաստանում ակադեմիական ազատության սահմանափակման և ԵՄ-ին անդամակցության դադարեցման պատճառով: Գերմանիայի համալսարաններում հիմնականում կրթաթոշակով սովորած վրացիները գիտակցում են այս կորստի նշանակությունը»,- գրել է դեսպանը։
Միաժամանակ, Ֆիշերը նշում է, որ Գերմանիայի կրթության նախարարության կողմից գրեթե 1 մլն եվրոյի ֆինանսավորումը դեռ պահպանվում է։
«Այս պահին դա նույնպես չի ազդել մեր կրթաթոշակային ծրագրերի վրա, ինչպիսին է DAAD-ը, չնայած Գերմանիան վերահսկում և վերանայում է Վրաստանի հետ իր հարաբերությունների բոլոր ասպեկտները», - գրել է դեսպանը։
