ՌԴ ԱԳ  նախարար Սերգեյ Լավրովը Պետդումայում ելույթ է ունեցել՝ հայտարարելով, որ Մոսկվան և Վաշինգտոնը պետք է մաքրեն ԱՄՆ-ի նախկին նախագահ Ջո Բայդենի վարչակազմի թողած ժառանգությունը, որն, ըստ նրա, խաթարել է երկու երկրների երկարաժամկետ համագործակցության հիմքերը։

Լավրովի հիմնական հայտարարությունները.

• Անվտանգության և ռազմավարական կայունության բանակցությունների պայմաններ կարող են ստեղծվել, քանի որ երեկվա բանակցությունները ցույց տվեցին, որ հարաբերությունների նորմալացման գործընթացը բոլոր ուղղություններով արդեն սկսվում է։
• ԱՄՆ նախագահ Դոնալդ Թրամփը հասկանում է ՆԱՏՕ-ի հարցում Ռուսաստանի դիրքորոշումը։ Նա առաջին և, թերևս, միակ արևմտյան առաջնորդն էր, որը բացահայտ հայտարարեց, որ ուկրաինական ճգնաժամի պատճառներից մեկը նախորդ վարչակազմի՝ Ուկրաինային ՆԱՏՕ-ի մեջ ներքաշելու կոշտ քաղաքականությունն էր։
• ԱՄՆ-ն Էր Ռիադում հավաստել է, որ երկկողմ տնտեսական նախագծերի ճանապարհից շահագրգռված է հեռացնել անիմաստ խոչընդոտները։ Մենք դա միայն ողջունում ենք։
• Ռուսաստանը կողմ է նոր հանդիպումներին, որոնք թույլ կտան լսել և հասկանալ միմյանց։
• Ռուսաստանը զարգացնում է համագործակցությունը բոլոր մայրցամաքների երկրների հետ, որոնցից մի քանիսի հետ հարաբերությունները հասել են ռազմավարական գործընկերության մակարդակի։
• Գլխավոր նպատակն անվտանգ և բարենպաստ արտաքին միջավայրի ստեղծումն է, որը կնպաստի Ռուսաստանի կայուն զարգացմանը։
• Աշխարհակարգի վերաբերյալ Ռուսաստանի տեսլականը հիմնված է բազմաբևեռության սկզբունքի վրա։ Սա պատմական գործընթաց է, որը զարգանում է օբյեկտիվ միտումների համատեքստում։
• Եվրասիական տարածքում նախատեսվում է ստեղծել կազմակերպություն, որը կհամախմբի տարածաշրջանի բոլոր երկրները։
• G20-ի հարթակը պետք է օգտագործվի որպես գործիք, որով արևմտյան գործընկերները կսովորեն համագործակցել հարգանքի վրա հիմնված սկզբունքներով, ոչ թե թելադրել իրենց միակողմանի լուծումները։
• Ռուսական պատվիրակության այցի արդյունքները Սիրիա խիստ դրական են։
• Մոսկվան և Դամասկոսը հաջորդ շաբաթ նախատեսում են բարձր մակարդակի հանդիպումներ։
• Սիրիան հասկանում է Ռուսաստանի հետ հարաբերությունների պատմական համատեքստը և ռազմավարական նշանակությունը։