Միջազգային
Հայ և ղազախ իրավապահները բացահայտել են հանցավոր խմբի գործունեություն
Ղազախստանի ՆԳՆ կիբեռհանցագործությունների հակազդման դեպարտամենտի և Հայաստանի քննչական կոմիտեի հատկապես կարևոր գործերի քննության գլխավոր վարչության աշխատակիցների համատեղ միջոցառումների արդյունքում Երևանում կանխվել է երկու զանգերի կենտրոնի գործունեությունը, որոնք զբաղվել են խարդախությամբ։ Այս մասին հայտնում է Ղազախստանի ՆԳ նախարարությունը։
Խումբը զբաղվել է ինտերնետ-խարդախությամբ Ղազախստանի և եվրոպական երկրների քաղաքացիների նկատմամբ, որոնք տուժածներին առաջարկել են գումար ներդնել իբր խոշոր ներդրումային ընկերություններում:
Խուզարկությունների ժամանակ առգրավվել է ավելի քան 70 միավոր համակարգչային տեխնիկա, մոտ մեկ կիլոգրամ ոսկի, հինգ ավտոմեքենա, 30 հազար ԱՄՆ դոլար, ռուսական ռուբլի, վրացական լարի և կրիպտոարժույթով դրամապանակ: Բացի այդ, առգրավվել է ավելի քան 100 հազար ԱՄՆ դոլար: Հատուկ գործողության ընթացքում ձերբակալվել է հանցավոր խմբի 41 մասնակից՝ Հայաստանի, Վրաստանի, Իրանի, Սիրիայի և Լիբանանի քաղաքացիներից:
Ինչպես հաղորդում են ղազախական լրատվականները, այս պահին հայկական կողմը Ղազախստանի ՆԳՆ կիբեռհանցագործությունների հակազդման դեպարտամենտի աջակցությամբ իրականացնում է քննչական գործողություններ և օպերատիվ-հետախուզական միջոցառումներ:
